Казанның 175нче гимназиясенең 600дән артык укучысы Кара диңгездә ял иткән

Җәйге каникуллар чорында Краснодар крае һәм Кырым лагерьларында Татарстаннан якынча 4,2 мең бала ял иткән.

(Казан, 14 сентябрь, «Татар-информ», Надежда Гордеева). Җәй көне Казанның 175нче гимназиясенең 601 укучысы Кара диңгез яр буенда бушлай ял иткән. Ул мәктәптә май аенда атыш булган иде. Мәктәп укучылары өчен Анапада «Глобус» шифаханәсендә ял оештырылды.

«175 нче гимназиядә укучы балаларны савыктыруны оештыру буенча эш алып барылды. Катлаулы бурычлар куелды, әмма без аларны шактый уңышлы үтәдек. Гомумән алганда, 601 баланы өч төркемгә бүлеп, уртача 200 кеше итеп, махсус составларда Кара диңгез яр буена җибәрдек», — дип сөйләде Татарстан яшьләр эшләре министры урынбасары Ринат Садыйков ТР Дәүләт Советының Социаль сәясәт комитеты утырышында.

Садыйков сүзләренчә, төрле сәбәпләр аркасында Татарстаннан читкә чыгудан баш тарткан гаиләдән тагын 36 бала «Заречье» лагеренда ял иткән. «Аерым гаиләләр шифаханә-курорт дәвалануы алды. Һәм кайбер гаиләләр өчен аерым ял оештырылды. Балалар ата-аналары белән бергә Краснодар крае шифаханәсендә булды», — дип ачыклык кертте ул.

Җәйге каникуллар чорында Краснодар крае һәм Кырым лагерьларында Татарстаннан якынча 4,2 мең бала ял иткән. Аерым алганда, 3,5 меңгә якын бала Анапа һәм Сочи лагерьларында, 700 дән артык бала Кырым Республикасы лагерьларында булды.