Актаныш яңа елга әзерләнә: егетләр боз кисә

Быел да үзәккә боз блоклары Иске Иделдән кайтарылачак.

(Казан, 13 декабрь, «Татар-информ»). Бүген Актанышта боз кисү эшләре тулы куәттә бара. Быел да үзәккә боз блоклары Иске Иделдән кайтарылачак. Бу турыда Актаныш муниципаль районы мәгълүмат үзәге хәбәр итә.

Әлеге хезмәткә Актаныш икмәк кабул итү предриятиесе, Түбән Кама сусаклагычын эксплуатацияләү һәм районның газ оешмалары җәлеп ителгән. Оешма-предприятие хезмәткәрләре бензин пычкысы белән кискән боз блокларын «Актаныш юллары», ИТК, ПМК кебек оешмалар алдан билгеләнгән мәйданнарга ташый.

Актаныш егетләре боз шәһәрчеген әкият иленә әйләндерү өчен тырышып эшлиләр, кырмыскалар кебек һәркайсы хәрәкәттә биредә. Әле бу эшкә кичә генә тотынсалар да, инде боз блоклары шактый тупланган.

Халык күпләп йөри торган мәйданнарда, гадәттәгечә, боздан корылмалар, шугалаклар, лабиринтлар ясаяачаклар.