Түбән Кама башкарма комитетына яңа җитәкче билгеләнде

Яңа урынга билгеләнгәнче Айрат Салаватов Түбән Кама районы башкарма комитеты җитәкчесе урынбасары булып эшләгән.

(Казан, 13 июль, «Татар-информ»). Айрат Салаватов конкурс комиссиясе карары белән Түбән Кама башкарма комитетының яңа җитәкчесе итеп билгеләнде. Яңа урынга билгеләнгәнче Салаватов Түбән Кама районы башкарма комитеты җитәкчесе урынбасары булып эшли. Бу хакта «НТР 24» хәбәр итә.

Әлеге вазифага шулай ук Түбән Кама башкарма комитеты җитәкчесе урынбасары Алексей Наполов һәм Минзәләдән «МетаСервис» ҖЧҖ директорының  төзелеш буенча урынбасары Александр Рязанов та дәгъва итте.

Бүген аларның документларын район җитәкчесе Айдар Метшин җитәкчелегендәге комиссия карады. Кандидатларның һәркайсы белән әңгәмә үткәрелде.

Түбән Кама башкарма комитеты җитәкчесенең вакантлы урынын биләүгә конкурс 17 июнь көнне Денис Баландин үз вазифасыннан киткәннән соң игълан ителгән иде.

«Денис Иванович Баландин җитәкчелегендә шәһәр башкарма комитеты башкарган эш шактый саллы, ул зур шәһәр хуҗалыгы белән бәйле зур эш фронты һәм бу бик мөһим һәм бик катлаулы эш», — дип искәрткән иде ул вакытта Метшин.