Татарстанда паркларга һәм скверларга барырга мөмкин

Инфекция таралуны булдырмый калуга юнәлдерелгән чаралар мәҗбүри булып кала.

(Казан, 13 май, «Татар-информ»). Татарстанда Covid-19 коронавирусы пандемиясе аркасында озак вакыт ябык булган паркларга һәм скверларга барырга мөмкин.

«Дуслар, Татарстан Республикасы Министрлар Кабинетының 2020 елның 10 маенда имзаланган 374 номерлы карары нигезендә, паркларны һәм скверларны ачарга рөхсәт ителә. Димәк, сез яраткан иҗтимагый киңлекләргә бара, анда йөри, хәтта йөгерә аласыз», — дип хәбәр итә Казанның парклар һәм скверлар дирекциясе Инстаграм социаль челтәрендәге үз битендә.

Инфекция таралуны булдырмый калуга юнәлдерелгән чаралар мәҗбүри булып кала. Шулай итеп, социаль дистанция сакларга, битлек һәм перчатка кияргә, кулларны дезинфекцияләргә кирәк.

Балалар һәм спорт мәйданчыклары элеккечә ябык. Кафелар бары тик алып чыгу һәм китереп бирү өчен генә эшли.