Әлки авылларындагы кайбер кибетләр тыштан да, эчтән дә шыксыз - җирле ММЧ

 (Казан, 13 апрель, “Татар-информ”). Әлки районы авылларындагы кайбер кибетләр тыштан да, эчтән дә шыксыз. Ә бит һәр сәүдә ноктасы чисталыгы, күркәмлеге белән җәлеп итәргә тиеш, дип борчыла “Әлки хәбәрләре” басмасы.

Район башкарма комитеты утырышында авыллардагы кибетләрнең торышы да тикшерелде. Бер ише кибетләрдә чисталык-пөхтәлек җитешми, товарлар урнаштыру тәртибе сакланмый. Бинасының тирә-юнен чүп-чар баскан, бакча рәшәткәләре ватык, буялмаган булганнары да бар.

Район башкарма комитеты җитәкчесе Александр Никошин сәүдә урыннары хуҗаларының һәм хезмәткәрләренең дә 1 апрельдән башланган санитар-экологик икеайлыгына кушылуын сорады. Ул һәр кибетнең эчке күренеше дә, тирә-юне дә күз явын алырлык чиста, төзек, матур булсын иде, дип мөрәҗәгать итте.