Татарстанлылар Сәламәтлек саклау министрлыгына максат һәм бурычлар билгеләде

Халык поликлиникаларда табиблар санын арттыруны һәм аларга кабул итүгә язылуны киңәйтүне сорый.
(Казан, 12 декабрь, «Татар-информ», Валерия Белова). Бүген Татарстан Сәламәтлек саклау министрлыгы Иҗтимагый советының йомгаклау утырышында 2020 елга ведомство алдына максатлар һәм бурычлар куйдылар. Әйтик, ТР Сәламәтлек саклау министрлыгы сайтында барган тавыш бирү нигезендә, Татарстан халкы, беренче чиратта, поликлиникаларда табиблар санын арттыруны сорый. Шулай ук алар яман шештән үлүчеләр саны кимүен һәм табибка күренүне көтү вакыты 14 көннән артып китмәсен өчен, УЗИның үтемлерәк булуын тели. Моннан тыш, Татарстанда яшәүчеләр һәм Иҗтимагый совет Сәламәтлек саклау министрлыгына мөмкин кадәр күбрәк стационарны ремонтлау һәм югары квалификацияле белгечләр санын арттыруга бәйле теләкләрен җиткерде.