Чүпрәледә муниципаль җирләрне һәм мөлкәтне арендага биргән вакытта төгәлсезлекләр бар

Авыл җирлекләре башлыкларының коррупциягә каршы кабул иткән хокукый-норматив актлары тулысынча үтәлми

 (Казан, 12 декабрь, “Татар-информ”, Роза Исмәгыйлова). Чүпрәле муниципаль районы башлыгы каршындагы коррупциягә каршы тору буенча комиссиянең утырышы булып үтте. Утырышта районның мөлкәти һәм җир мөнәсәбәтләре палатасы рәисе Әлфир Закировның “Чүпрәле муниципаль районы гражданнарына торак төзелеше һәм коммерция структуралары биналары өчен җир кишәрлекләре бүлеп бирү тәртибе турында”гы информациясе тыңлап тикшерелде, дип хәбәр итә “Туган як” газетасы.
Комиссия каравына Городище һәм Марс авыл җирлекләрендә коррупциягә каршы тору буенча эшнең куелышын тикшерү дә кертелгән иде. Әлеге мәсьәлә буенча авыл җирлекләре башлыклары Сергей Салифанов, Фәрит Мифтахов чыгыш ясады.
Комиссия әгъзалары, утырышка чакырылган җитәкчеләр алдында чыгыш ясап, район прокуроры Алмаз Әхмәтшин коррупция белән көрәштә закон куллану процессында еш килеп туа торган проблемалы сорауларга тукталды һәм аларга аңлатма бирде. Аерым алганда, муниципаль җирләрне һәм мөлкәтне арендага биргән вакыттагы төгәлсезлекләрне, авыл җирлекләре башлыклары тарафыннан коррупциягә каршы көрәш кысаларында кабул иткән хокукый-норматив актларның тулысынча үтәлмәвен ассызыклады ул. Шулай ук коррупцион хокук бозулар өчен җаваплылыкка китерә торган закон актлары белән дә таныштырды.