Түбән Кама янгын сүндерүчеләре «Хәтер бакчасы» акциясенә кушылды

(Казан, 12 май, «Татар-информ»). Түбән Кама янгын сүндерүчеләре «Хәтер бакчасы» акциясенә кушылды, акциянең максаты — 27 миллион төп агач утырту.

35нче янгын сүндерү-коткару часте янындагы аланда янгын сүндерүчеләр утызлап алма, груша, шомырт, сирень, акация һәм башка агачлар утыртты. Бу турыда Түбән Кама муниципаль районы рәсми сайтында хәбәр ителә.

Киләчәктә бакча һәр язны биредәге предприятиеләрдә эшләүчеләрне һәм узып баручыларны матурлыгы һәм хуш исе белән сөендереп, безнең бүгенге тыныч тормышыбызның нинди корбаннар бәрабәренә килгәнен искә төшерер.