Алексей Песошин Татарстан халкын Космонавтика көне белән котлады
Республиканың зур потенциалын куллану космик тармакның алга таба да нәтиҗәле үсешенә ярдәм итәргә тиеш, диде РТ Премьер-министры.
(Казан, 12 апрель, "Татар-информ"). Татарстан Республикасы Премьер-министры Алексей Песошин республика халкын Космонавтика көне белән котлады. Бу хакта ТР Президенты матбугат хезмәте хәбәр итә.
"Космонавтика бүген фән һәм техниканың яңа казанышларын кулланырга, җитештерүне яхшыртырга һәм модернизацияләргә мәҗбүр итә», — дип билгеләп үтте Татарстан Республикасы Премьер-министры.
Космик киңлекләрне үзләштерүгә, шулай ук яңа технологияләр булдыруга Казан конструкторлык бюросы һәм фәнни-тикшеренү институтлары эшләнмәләре зур өлеш кертте, диелә котлауда.
"Бүген космик киңлекләрне яулап алуның данлы традицияләре лаеклы рәвештә дәвам ителә — якташыбыз, астронавт Сергей Николаевич Рыжиков Халыкара космик станциядә озак космик очышны башкарганда күрсәткән батырлыгы һәм каһарманлыгы өчен Россия Федерациясе Герое исеменә лаек булды", - диде Песошин.
Һичшиксез, республикабызның зур сәнәгать, фәнни-техник, мәгариф потенциалын куллану космик тармакның алга таба да нәтиҗәле үсешенә ярдәм итәргә тиеш, дип өстәде ул.