Футуролог Covid-19 вирусын эпидемия турындагы фильмнар белән чагыштыра
Хәзерге коронавирус пандемиясе цивилизацияне бетерә алмый.
(Казан, 11 апрель, «Татар-информ», Егор Никитин). Голливуд фильмнарыннан глобаль эпидемияләр турындагы сценарийлар коронавирус пандемиясе вакытына тулысынча туры килми булып чыкты. Андрей Кузьмин белән интервьюда бу фикерне Россия журналисты, фәлсәфәче һәм футуролог Константин Фрумкин әйтте.
«Кино күңел ачу өчен куела, шуңа күрә анда кискен моментлар арттырылган. Тормыш — ул һәрвакыт күңелсезрәк, һәм безнең вакыйгалар андый ук якты түгел. Андый әсәрләрдә төп „фишкаларның“ берсе кешелекне тулысынча диярлек юк итү, ә калган кешеләр яңа кырыс шартларга эләгә», — дип аңлатты футуролог.
Аның сүзләренчә, эпидемия темасына фантастик фильмнардан һәм китаплардан аермалы буларак, чын вакыйгалар кеше цивилизациясен коронавирустан күпкә куркынычрак авырулар да юк итә алмавын күрсәтте. Ул мисал итеп, урта гасыр чумасын китерде, ул шул чорда яшәгән халыкның яртысын юк итте.
«Әмма цивилизация барыбер юкка чыкмады. Шәһәрләр һәм дәүләтләр калды, җәмгыятьнең барлык институтлары сакланган. Шуңа күрә хәзер без фантастик дөньяда булырбыз дип уйларга бернинди нигез дә юк. Димәк, эпидемия турындагы барлык фильмнар файдасыз булып чыга», — диде Константин Фрумкин.
Андрей Кузьмин белән әңгәмәдә галим шулай ук Covid-19 тирәсендә массакүләм истерика сәбәпләре һәм хәзерге үзизоляция бизнес, дәүләт һәм бер гаилә әгъзалары арасындагы гадәти процессларны ничек җимерәчәге турында сөйләде.