Казанда җәмәгать транспортында битлек режимын контрольдә тоту көчәйтеләчәк

Тикшерүләрнең артуы Яңа ел бәйрәмнәрендә закон бозу очракларының күбәюе белән бәйле.

(Казан, 11 гыйнвар, «Татар-информ», Әдилә Зыятдинова). Яңа ел бәйрәмнәрендә закон бозу очракларының артуы сәбәпле, Казанның җәмәгать транспортында битлек режимын контрольдә тотуны көчәйтәчәкләр. Казан шәһәре Башкарма комитетының Транспорт комитеты рәисе Айдар Габделхаков мэриядә узган эшлекле дүшәмбе киңәшмәсендә шулай дип белдерде.

«Бәйрәмнәргә дә карамастан, контроль-ревизия хезмәтендә эшләүчеләр тарафыннан җәмәгать транспортында пассажирларның битлектән булуын тикшерү дәвам итте. Бүгенге көннән битлек режимын контрольдә тоту көчәйтеләчәк», - диде спикер.

Ул билгеләп үткәнчә, Яңа ел бәйрәмнәрендә 720 транспорт чарасы тикшерелгән, 215 закон бозучы ачыкланган.