12 июньдә Казан Кремлендә кайбер күргәзмәләр бушлай эшләячәк
Экскурсияләр алдан язылу буенча үткәрелә.
(Казан, 10 июнь, «Татар-информ»). Россия көнен бәйрәм итү хөрмәтенә, 12нче июньдә шәһәр халкы һәм кунаклары «Казан Кремле» Музей-тыюлыгында кайбер күргәзмәләрдә бушлай катнаша алачак.
«Манеж» залының «Яңарыш» күргәзмәсенә килүчеләр Зөя утрау-шәһәрчеге һәм борынгы Болгар тарихы белән танышачак. Экспозициядә «Яңарыш» фонды эшчәнлеге нәтиҗәсендә торгызылган объектлар тәкъдим ителә.
Татар халкы һәм Татарстан Республикасы дәүләтчелеге тарихы музеенда шәһәр халкына һәм Казан кунакларына «Тарихка таба» күргәзмәсен күрсәтәчәкләр. Ул ТАССР барлыкка килүенең 100 еллыгына багышланган һәм оборона җитештерүнең, авыл хуҗалыгының төрле өлкәләрендә төбәкнең төп казанышларын күрсәтә.
Күргәзмәләрдә булганда килүчеләргә 1,5 метр дистанцияне сакларга, битлек һәм перчаткалар кияргә кирәк. Экскурсияләр алдан язылу буенча үткәрелә.