Россиялеләргә хезмәт хакын арттыру ысулларын аңлаттылар

Хезмәткәр таләп ителгәннән күбрәк эшләсә, эш авыраеп китсә яки эш шартларының куркынычы артса, финанс шартларын яхшыртуны таләп итәргә хокуклы.

(Казан, 10 май, «Татар-информ»). Адвокат Марина Буянова «Кичке Мәскәү» тапшыруында җитәкчелектән хезмәт хакын утыз процент тирәсе арттыру турында сорау нигезле булган очраклар турында сөйләде.

РИА Новости хәбәр иткәнчә, юрист башкарылган эшләрнең күләмен һәм авырлыгын исәпкә алырга киңәш итә. Шулай итеп, хезмәткәр әгәр дә таләп ителгәннән күбрәк эшләсә, эш авыраеп китсә яки эш шартларының куркынычы артса, финанс шартларын яхшыртуны таләп итәргә хокуклы.

Шул ук вакытта юрист хезмәт килешүендә язылган вазифаи бурычларны реаль арттырып үтәү белән бутамаска чакырды.

«Хезмәт хакын арттыруга икенче сәбәп — ул сез квалификациягезне арттырган очрак була ала. Бу хезмәткәр укуны һәм эшне бергә алып барган вакытта өстәмә белем алу, нинди дә булса курс үтү яки хәтта югары уку йортын тәмамлау булырга мөмкин», - диде Буянова.

Адвокат шулай ук хезмәткәргә башка компаниядә эш тәкъдим иткән очрактан файдаланырга киңәш итте. Бу вакытта ул хезмәт шартларын яхшырту шарты белән үз урынында калырга әзер. 

«Эш бирүчегә: миңа башка шартларда эш тәкъдим иттеләр, әмма сезнең белән эшләү бик ошый. Хезмәт хакын бераз арттырсалар, мин калыр идем. Миңа коллектив та, җитәкчелек тә ошый… , дип аңлатырга кирәк", — дип киңәш итә юрист.

Буянова барлык очракларда да хезмәт хакы, күп дигәндә, өчтән бер өлешкә артырга мөмкин, дип нәтиҗә ясады.