Гыйнвар азагына кадәр Казанда Яңа ел чыршыларын кабул итү пунктлары эшләячәк

Агачлар кәҗәләргә азык буларак кулланылачак.

(Казан, 10 гыйнвар, "Татар-информ"). 10 гыйнвардан 31 гыйнварга кадәр Казанда Яңа ел чыршыларын кабул итү буенча ике пункт эшлиячәк. Бу турыда Казан мэриясенең матбугат хезмәте хәбәр итте.

Агачлар өчен контейнерлар Гадел Кутуй урамы, 160 йорт адресы буенча "Идел буе экология компаниясе" офисы янәшәсендә; шулай ук Җиңү Проспекты, 141 йорт адресында урнашкан сәүдә үзәге янында урнаштырылачак. Кабул итү пунктлары тәүлек әйләнәсе һәм 31 гыйнварга кадәр эшли, диелгән әлеге хәбәрдә.

Һәркем чыршы, нарат, пихта, чыршы ботакларын алып килеп, махсус контейнерга сала ала. Кабул ителгән агачлар кәҗәләргә азык буларак кулланылачак.