Алабугада яңа причал ачылды

(Казан, 9 сентябрь, «Татар-информ»). Алабугада тантаналы рәвештә яңа причал, ә шәһәр янында, Бехтерево авылында Мәдәният йорты ачылды. Ачылу тантанасында катнашкан мәртәбәле кунаклар арасында Татарстанның төзелеш, архитектура һәм торак-коммуналь хуҗалык министры Фәрит Хәнифов та бар иде. Бу турыда «Новая Кама» газетасы яза.

Башта министр  «Безнең ишегалды» республика программасы буенча яңартылган Нефтьчеләр проспекты буенча 23нче йорт ишегалдын карады. Ул биредә башкарылган эшне бәяләде һәм халык белән аралашты.

Аннары министр һәм башка кунаклар шәһәр причалына юнәлде. Анда аларга хәзер туристлар белән теплоходлар туктый торган урынны күрсәттеләр.

Шуннан соң Фәрит Хәнифов Бехтерево авылына юнәлде, анда капиталь ремонттан соң тантаналы шартларда Мәдәният йорты ачылды. Ул төзүчеләргә һәм подрядчы оешмаларга Рәхмәт хатлары тапшырды.

Моннан тыш, министр Мәдәният йорты мөдире Диана Агаевага 100 мең сумлык сертификат тапшырды.

Мәдәният йортын ачу тантанасында шәһәрнең һәм районның иҗат коллективлары чыгыш ясады.