Ютазы районы Кәрәкәшле авылында яңа һәйкәл куелды

Һәйкәл район һәм җирле хуҗалык хисабына ясатылган.

(Ютазы, 9 май, «Татар-информ»,«Ютазы таңы», Лилия Гәрәева). Ютазы районы Кәрәкәшле авылында Бөек Ватан сугышында һәлак булган батырлар истәлегенә яңа һәйкәл куелды. Бу турыда район басмасы хәбәр итә.

Яңа һәйкәл мәдәният йорты территориясенең алгы ягында урнаштырылды. Һәйкәл район һәм җирле хуҗалык хисабына ясатылган, эшне бүген тулысынча тәмамлау күздә тотыла.

«Авылыбыздагы иске һәйкәл дә сакланып калды, аның территориясен мәдәният йорты хезмәткәрләре матурлап буяп, чистарттылар. Бүген менә һәйкәл урнаштырудан тыш, мәдәният йортында эшләүче хезмәткәрләр белән батырларның исемнәре язылган истәлек ташларын яңартабыз, — дип эшләгән эшләре турында сөйләде Кәрәкәшле авылы мәдәният йорты директоры Эльвира Исхакова.