Питрәч районының бер авылында “Май чабу” бәйрәмен билгеләп үттеләр

Сынамышлар буенча, бәйрәмне күңелле итеп үткәрүчеләрнең елы да уңышлы булачак.

(Питрәч, 9 март, “Татар-информ”, Гөлүзә Василова). Бүген Питрәч районының Княжа авылында кышны озатып язны каршылау бәйрәмен оештырдылар. Бу турыда бәйрәмдә катнашучылар хәбәр итә.

Сынамышлар буенча, бәйрәмне күңелле итеп үткәрүчеләрнең елы да уңышлы булачак. Аларның үсеп килүче яшь буынны тәрбияләүдә, төрле милләт халыкларын берләштерүдә әһәмияте зур.

Питрәч җирлегендә дә төрле милләт халыклары дус, тату яши. Һәр милләт электән үк бәйрәмнәрне бергә-бергә үткәреп килә. Бүгенге Май чабу бәйрәмендә дә шушы традиция сакланды: руслар да, татарлар да күңел ачты, биеде, җырлады, төрле уеннарда катнашты, коймак белән сыйландылар.

Май чабу бәйрәме ахырына якынлашканда карачкыны изге теләкләрне әйтә-әйтә яндырдылар. Шулай итеп, әлеге чарада катнашучылар кышны озаттылар, яз тизрәк килсен дип теләделәр.