Татарстанлыларга 57 358 вакантлы эш урыны тәкъдим ителә

Хисап атнасында эш бирүчеләр 4 166 вакантлы эш урыны тәкъдим итте.

(Казан, 7 октябрь, «Татар-информ»). 2021 елның 6 октябренә республиканың мәшгульлек үзәкләрендә рәсми рәвештә теркәлгән 16 078 эшсез граждан исәпләнә, бу узган хисап датасына караганда 302 кешегә кимрәк.

Татарстанда эшсезлек дәрәҗәсе эшче көчләр саныннан 0,79% тәшкил итә, дип хәбәр итә республиканың Хезмәт министрлыгы.

Татарстан Республикасы мәшгульлек үзәкләренә эш бирүчеләр тарафыннан хәбәр ителгән ихтыяҗ 57 358 вакансиядән гыйбарәт. Хисап атнасында эш бирүчеләр 4 166 вакантлы эш урыны тәкъдим итте. Хезмәт базарында киеренкелек коэффициенты шартлы рәвештә бер вакансиягә 0,28 кеше тәшкил итә.

Шуны да билгеләп үтәргә кирәк, яңа эшсезләрнең 541е элек хезмәт эшчәнлеген башкарган. 25 кеше оешма бетерелүгә яки хезмәткәрләр штаты кыскаруга бәйле рәвештә рәсми эшсез кеше статусы алды.