«ТАИФ» идарәчесе Түбән Кама Башкарма комитеты башлыгы урынбасары итеп билгеләнде

(Казан, 6 декабрь, «Татар-информ», Эльза Кузнецова). Ренат Шакиров Түбән Кама районы Башкарма комитеты җитәкчесенең беренче урынбасары итеп билгеләнде. Ул Башкарма комитет эшенә, икътисади үсеш, территориянең иминлегенә бәйле мәсьәләләргә кураторлык итәчәк. Башкарма комитет җитәкчесе Рамил Муллин эшлекле дүшәмбе киңәшмәсендә шулай дип белдерде.

Ренат Шакиров 14 елдан артык Казанда салым хезмәте идарәсендә, соңгы елларда «ТАИФ» структурасында эшләгән һәм «Татнефтепродукт» холдинг компаниясе акционерлык җәмгыятен җитәкләгән.

«Аның акча әйләнеше 8 миллиард сум, хезмәткәрләр саны 1 меңнән артып киткән компания белән җитәкчелек итүдә гаять зур тәҗрибәсе бар. Ул территориаль мәйданчыкка да җитәкчелек итте, генераль директор вазифасын да башкарды», - дип искәртте Муллин.

«Сезнең зур тәҗрибәгез хакимият структурасында эшләргә ярдәм итәр дип өметләнәм, - дип мөрәҗәгать итте ул Ренат Шакировка. - Бездә көчле җитәкчеләр тупланган, барлык структуралар, бизнес, хакимият, сәнәгать предприятиеләре белән тыгыз элемтәдә эшләргә кирәк».