Җәмгыять 6 ноябрь 2020 17:58

Яңа елдан Татарстанда җәмәгать транспортында йөрү өчен социаль билетның бәясе арта

Дәүләт ярдәменә мохтаҗ балалар өчен юл йөрү билеты 320 сум, калган социаль категориядәге гражданнар өчен 526 сум булачак.

Скопировать ссылку

(Казан, 6 ноябрь, «Татар-информ»). Киләсе 2021 ел башыннан Татарстанда җәмәгать транспортында йөрү өчен социаль билетның бәяләре артачак. Әлеге карарны ТР Премьер-министры Алексей Песошин имзалады.

Документ нигезендә, балалар өчен юл йөрү билеты бәясе 13 сумга артачак һәм 320 сум (элекке 307 сум урынына) тәшкил итәчәк. Социаль билеттан инвалид балалар, гомуми белем бирү учреждениеләрендә, башлангыч һәм урта һөнәри белем бирү учреждениеләрендә (18 яшькә кадәр) белем алучы ишле гаилә балалары, шулай ук ятим һәм ата-ана тәрбиясеннән мәхрүм калган балалар файдалана ала.

Калган категория гражданнар өчен җәмәгать транспортында йөри торган социаль билет элеккеге 505 сум урынына 526 сум торачак. Мондый юл йөрү билетын Бөек Ватан сугышы инвалидлары һәм анда катнашучылар, сугыш хәрәкәтләре ветераннары, концлагерьларның балигъ булмаган тоткыннары, инвалидлар, ТР Дәүләт социаль хезмәт күрсәтү системасы хезмәткәрләре (һ.б.) файдалана ала.

Әлеге карар 2021 елның 1 гыйнварыннан үз көченә керә.

#юл йөрү билетлары #Бердәм укучы билеты #билет #билет бәясе

Сәхифәләр

Яңа елдан Татарстанда җәмәгать транспортында йөрү өчен социаль билетның бәясе арта