40 яшьтән өлкәнрәк кешеләрнең өстәмә ял көне барлыкка киләчәк

Закон 11 августтан үз көченә керә.

(Казан, 6 август, «Татар-информ»). Россиядә 40 яшьтән өлкәнрәк һәм эшләүче кешеләргә диспансеризация узу өчен түләнә торган өстәмә ял көне биреләчәк. Шул хактагы закон 11 августтан үз көченә керәчәк. Бу турыда «Известия» газетасы яза.

Өстәмә ял көненнән (уртача хезмәт хакы саклана) елына бер тапкыр файдаланырга мөмкин. Гражданин тикшеренү узгач эш бирүчегә медицина оешмасыннан диспансеризация үтүне раслый торган белешмә алып килергә тиеш.

«40 яшьтән өлкәнрәк хезмәткәрләргә диспансеризация узу өчен ял көне бирү турындагы законны Россия Президенты Владимир Путин 31 июльдә имзалаган», - дип хәбәр итә басма.