Илсур Метшин казанлыларны Роспотребнадзор рөхсәт иткәнче су кермәскә чакырды

Июнь аенда шәһәрдәге су объектларында барлыгы биш кеше батып үлгән.

(Казан, 6 июль, «Татар-информ», Екатерина Ларионова). Татарстан башкаласы мэры Илсур Метшин казанлыларны Роспотребнадзорның рәсми рөхсәтенә кадәр муниципаль сулыкларда коенмаска чакырды. Ул шәһәр Башкарма комитетында узган оператив штаб утырышында шул хакта хәбәр итте.

«Без коену сезонын башларга әзер булсак та, әлегә Роспотребнадзорның рәсми рөхсәте юк. Без актив ял яратучыларга түземлек күрсәтүләрен һәм рәсми коену сезоны ачылганчыга кадәр су кермәүләрен сорап мөрәҗәгать итәбез», - диде Метшин.

Аның сүзләренчә, гамәлдәге чикләүләргә дә карамастан су коенучылар бар. Шуның аркасында шәһәр Башкарма комитетында коткаручылар хезмәтен оештырырга карар кылганнар, аның хезмәткәрләре алты кешенең гомерен саклап калган инде, дип өстәде Метшин.

Июнь аенда шәһәрдәге су объектларында барлыгы биш кеше батып үлгән. Зур Аккош күле, Комсомол күле, Җиңү паркы һәм Кече Аккош күле буендагы пляжларда (аларда коткаручылар эшли) батып үлүчеләр юк, дип хәбәр итте Казан шәһәре Башкарма комитетының Гражданнарны яклау идарәсе башлыгы Фердинант Тимерханов.