Бүген – “Татар-информ” мәгълүмат агентлыгының туган көне

Бүген – “Татар-информ” мәгълүмат агентлыгының туган көне

(Казан, 6 июнь, “Татар-информ”, Ләйсән Абдуллина). Бүген “Татар-информ” мәгълүмат агентлыгы оешуга 17 ел тула.

1990 елның 6 июнендә КПССның Татарстан өлкә комитеты бюросының “Хуҗалык исәбендәге “Татар-информ” мәгълүмат агентлыгын оештыру турында”гы карары дөнья күрә. Документка КПСС өлкә комитеты секретаре Минтимер Шәймиев кул куя. Карар нигезендә, КПСС өлкә комитеты нәшрияты, ТАССР Дәүләт нәшрият комитеты һәм “Поинт” уртак предприятиесе агентлык оештыру башлангычы белән чыга. Яңа мәгълүмат агентлыгы рус һәм татар телләрендә бер үк исемдәге әдәби газета, “Татар-информ”ның реклама кушымтасын, ике дәүләт телендә “Эш” (“Дело”) коммерция газеталарын чыгарырга тиеш була.

Шушы еллар эчендә “Татар-информ” агентлыгы ТР “Татмедиа” гаммәви коммуникацияләр агентлыгы ярдәмендә баштагы планнарның чикләрен күпкә узып китте. Хәзер “Татар-информ” – Татарстан Республикасының иң эре мәгълүмат агентлыкларыннан берсе, ул Россиянең әйдәп баручы мәгълүмат агентлыклары рәтенә керә. www.tatar-inform.ru сайтыннан көн саен дөньяның 60 илендә яшәүче 7500 кеше файдалана.

Бүгенге көндә көндә “Татар-информ” агентлыгында федераль һәм төбәк гаммәви мәгълүмат чараларында чыныгу алган 180 кеше хезмәт куя. Мәгълүмат агентлыгының заманча студиясе бар, аның хезмәткәрләре уникаль техник мөмкинлекләргә ия җиһазлардан файдалана.

“Татар-информ” – күп тармаклы структура. Агентлык бренды астында кулланучыларга рус, татар һәм инглиз телләрендә “Татар-информ” хәбәрләре яңалыклар лентасы; Идел буенда беренче интернет-телевидение; әйдәп баручы сәясәтчеләр, җәмәгать эшлеклеләре, спортчылар һәм башкаларның әңгәмә һәм шәрехләре; Интернетта трансляцияләнә торган онлайн режимындагы матбугат конференцияләре; “Бизнес-навигатор” – Татарстандагы эшлекле тормыш хроникасы; “Точка над i” телепрограммасы; чит ил, Россия һәм Татарстан гаммәви мәгълүмат чараларының көндәлек мониторингы; “Газета эчендә газета” – гомуми тиражы 270 мең данә тәшкил иткән район газеталарындагы атналык 4 битлек кушымта; “Татар иле” һәм “Татарские края” атналык газеталары; “Антинарк” журналы һәм башка мәгълүмати продукт тәкъдим ителә.

Моннан төгәл ике ел элек “Татар-информ”ның генераль директоры итеп Леонид Толчинский билгеләнде.