Рөстәм Миңнеханов: Мин хатын-кыз президент өчен тавыш бирергә әзер

ТР Президенты Аппаратында һәм республика Хөкүмәтендә күп кенә җаваплы вазифаларны хатын-кызлар башкара.

(Казан, 6 март, «Татар-информ», Диана Авакян). Татарстан Президенты Рөстәм Миңнеханов хатын-кыз президент өчен тавыш бирергә әзер булуын әйтте. Бу хакта ул журналистлар белән очрашуда «Татар-информ» мәгълүмат агентлыгы хәбәрчесе соравына җавап биргәндә белдерде.

«Иң мөһиме, кешенең республика өчен файдалы булуы. Хатын-кызлар бик җитди һәм уңайсыз мәсьәләләрне хәл итәргә сәләтле. Бездә бернинди стереотиплар юк», — диде ул.

ТР Президенты Аппаратында һәм республика Хөкүмәтендә күп кенә җаваплы вазифаларны нәкъ менә хатын-кызлар били, дип өстәде Миңнеханов.