^Әлмәттә балалар өчен яңа ел бәйрәмнәре дәвам итә

(Әлмәт, 5 гыйнвар, "Татар-информ", Марат Бәдретдинов). Бүген Әлмәттә Балалар-яшүсмерләр иҗаты үзәгендә шәһәрнең гомум белем бирү мәктәпләрендә укучы талантлы балалар өчен яңа ел бәйрәме үтте. Бәйрәм чарасында Әлмәтнең талантлы һәм иҗади фикер йөртүче укучылары катнашты. Балаларны Яңа ел белән Әлмәт муниципаль районының башкарма комитет җитәкчесе урынбасары Василий Самойлов котлады һәм укуларында уңышлар теләде.

“Ел саен талантлы балаларның артуы шатландыра, алар – безнең горурлыгыбыз һәм өметебез”, - дип билгеләп үтте ул үз чыгышында. Балалар-яшүсмерләр иҗаты үзәге хезмәткәрләре укучылар өчен бәйрәм концерты оештырган. 1 гыйнварда үзәктә ятим балалар һәм инвалидлар өчен бәйрәм кичәләре үткәрелде инде.