Мөслим районының Әлмәт авылында һәр кешедән 4800 сум үзара салым җыярга җыеналар

Җыелган акчага су проблемасын хәл итәргә планлаштыралар.

(Мөслим, 4 декабрь, «Татар-информ», «Мөслим-информ», Лилия Шәймиева). Мөслим районының Әмәкәй авылында үзара салым җыюга ха­лык зур җаваплылык белән карый. Узган ел Әмәкәй авыл җирлегенә керүче ике авылда да һәр кешедән 700 сум үзара салым җыйганнар. Быелгы җыенда Әлмәт авылында һәр кешедән 4800 сум акча җыярга булганнар, ә Әмәкәй авылында үзара са­лым акчасын 1 мең сумнан җыярга сөйләшкәннәр.

Дәүләт ха­лыктан җыелган акчаны дүрт тапкырга арттырып кайтар­ган. Бер миллион 236 мең сум акчага Әмәкәй авылының иске чүплегенә күптән көтелгән ре­культивация ясалган. Сабантуй мәйданында 300 метр арада ба­ганалар утыртылып, электр ли­ниясе сузылган.

«Төзелеш материаллары­на бәя көн саен арта. Акчаны максатчан файдалану нияте белән, Әмәкәй зиратын әйләндереп алу өчен 300 метр арага тимер штакетникларны алдан алып куйдык. Су баш­нясын әйләндереп алу өчен профильләр, баганалыклар да кайтардык. Материалларның әзер булуы мөһим. Эшләрне җәй көне төгәлләрбез, дип уйлыйм», — ди Әмәкәй авыл җирлеге баш­лыгы Илнар Шакирянова.

Әлмәт авылында су пробле­масы, күпләр уйлаганча, сусыз­лыкка бәйле түгел. Коры җәйдә дә халык суга интекмәгән. Тик су тәмсез, эчәрлек түгел. Тикшерүләрдән күренгәнчә, суның составында тимер дүрт мәртәбә артык.

Әлмәт авылын­да бүген 43 кеше гомер кичерә. 43 кеше дә 4800 сум тапшыр­ган очракта 206 мең 500 сум акча җыелырга тиеш. Бу акча су проблемасын хәл итәргә мөмкинлек бирәчәк. Әлеге сумманың 161 мең сумын җыярга да өлгергәннәр.

Әмәкәй авылында үзара са­лым акчасын халыкның яшәү шартларын яхшырту максатын­да кулланыла. Үзара салым хисабына Әмәкәй һәм Әлмәт авыллары­на янгын гидрантлары, кран­нар, кирәге чыкса дип, ике су насосы да алып куйганнар.