Татарстанда халыкны сыйфатлы торак белән тәэмин итү программасын расладылар

(Казан, 4 октябрь, «Татар-информ»). Татарстан Министрлар Кабинеты республика халкын сыйфатлы торак һәм торак-коммуналь хезмәтләре белән тәэмин итү программасын раслады. Бу карар Татарстан Хөкүмәте сайтында чыкты.

«Программа 2020-2025 елларда гамәлгә ашырылачак. Программа чараларының күп өлеше Россия Федерациясе һәм Татарстан Республикасы йөкләмәләрен эзлекле рәвештә гамәлгә ашыру белән бәйле булганга күрә, программаны гамәлгә ашыру этапларын бүлеп бирү каралмаган», - диелгән документта.

Программаны гамәлгә ашыруга 93 млн сумнан артык акча тотылачак. 2025 елга Татарстанда яшәүче бер кешегә торак биналарның гомуми мәйданы 31,4 кв. метрга кадәр артыр, тузган торак өлеше 0,2 процентка кадәр һәм башкалар кимер, дип көтелә.

Документка 3 октябрьдә имза куелды. ТР Төзелеш, архитектура һәм торак-коммуналь хуҗалык министрлыгына, ТР Яшьләр эшләре министрлыгына һәм ТР Мәгариф һәм фән министрлыгына карарның үтәлешен контрольдә тоту йөкләнгән.