Җәяүлеләр өчен – яшел ут

(Казан, 4 октябрь, “Татар-информ”, Роза Исмәгыйлова). Чаллының “Мегастрой” сәүдә үзәге янында яңа светофор эшли башлады, дип хәбәр итә “Челнинские известия”.
Светофор чыгымнарын сәүдә үзәге тулысынча үзе күтәргән. Тиздән беренче автомобиль юлында өч җир асты юлы да барлыкка килергә тиеш. Хәзерге вакытта сәүдә йорты янәшәсендәге юллар барлыкка таләпләргә дә туры китерелеп башкарылган. Шәһәр ЮХИДИ башлыгы урынбасары Айдар Магизов сүзләренә караганда, бәлки, киләчәктә биредә җәяүлеләргә бәйле юл һәлакәтләре булмас инде. Аннан соң бу яңалык бөкеләр проблемасын хәл итүдә дә роль башкарачак. Яңа светофор үзеннән 700 метр ераклыкта урнашкан светофор белән синхрон рәвештә эшләнүгә көйләнгән.