Алабугада узачак Спас ярминкәсенең программасы билгеле булды

Бал шәһәрчегендә 134 умартачы үз продукциясен тәкъдим итәчәк.

(Алабуга, 4 август, «Татар-информ», «Алабуга нуры»). Алабугада Спас ярминкәсе 6, 7, 8 август көннәрендә узачак. Ярминкәдә Россиянең 142 торак пунктыннан 521 декоратив-гамәли сәнгать остасы, 2 407 ваклап сату предприятиесе һәм сәнәгать оешмалары, 352 җәмәгать туклануы предприятиесе катнашачак.

Ярминкә көннәрендә «ВДОХновение» XX Бөтенроссия автор җыры фестивале кысаларында Грушин фестивале узачак. Ул музыка яратучыларга ярминкәнең төп бүләге. Анда Мәскәү, Санкт-Петербург, Казан, Чистай, Түбән Кама, Менделеевск, Яр Чаллы, Алабугадан 25 автор-башкаручы катнашыр дип көтелә. 

Кыңгырау чыңы фестиваленә Россиянең 40 торак пунктыннан 218 катнашучы килүе көтелә. 

«Һөнәрчеләр ишегалды» проекты кысаларында Россиянең 20 торак пунктыннан килгән 35 декоратив-гамәли сәнгать остасы 270 бушлай мастер-класс үткәрәчәк.

Россиянең нәсел утарлары фестивале 6 нәсел утарын үзенә туплый. Бал шәһәрчегендә 134 умартачы үз продукциясен тәкъдим итәчәк. 

Музей-күргәзмә объектлары 6-7 августта 21.00 сәгатькә кадәр эшләячәк.