Угрыдан кала, уттан калмый...

(Казан, 4 июль, «Татар-информ»). Республика янгынга каршы дәүләт хезмәтенең матбугат үзәге хәбәр итүенчә, узган ял көннәрендә республикада 24 янгын чыгу очрагы теркәлгән. Әлеге янгыннарда 2 кеше тән җәрәхәтләре алган, 12 кеше янгын вакытында агулану булган урыннардан коткарылган, ә 3 кешенең исә гомере өзелгән.

Казан шәһәренең Портовая урамында янгын иртәнге сәгать биштә башлана. Янгын сүндерүчеләр оператив эшләсәләр дә, 60 яшьлек йорт хуҗасының гомерен саклап калу мөмкин булмый. Экспертлар аңа, исерткеч эчемлекләр куллану нәтиҗәсендә, төтеннән буылган, дигән нәтиҗә ясый. Янгыннан килгән зыянның күләме әлегә ачыкланмаган.

Буа шәһәренең К.Маркс урамында янгын төнге берләрдә башлана. Янгын сүндерүчеләр аны тиз арада сүндерсә дә, ашыгыч ярдәм соң чакырылу сәбәпле, агач йорт шактый зыян күрергә өлгергән була. Йортны чистарткан вакытта харәбәләр арасыннан 47 яшьлек йорт хуҗасы һәм аның билгесез кунагының гәүдәләре табыла. Янгын чыгуның сәбәбе дә, аңа килгән зыян да әлегә ачыкланмаган.

Ә менә Әлмәт районының Акташ бистәсендә ундүрт яшьлек үсмер ут белән шаяру нәтиҗәсендә, шактый гына авыр тән җәрәхәтләре алып хастаханәгә озатыла.

Статистик мәгълүматларга караганда, агымдагы елның беренче яртысында 1670 янгын чыгу очрагы теркәлгән. Аларда 113 кешенең гомере өзелгән. Моның җитди сәбәпләре булып һаман да ут белән сак эш итмәү һәм электр приборларын саксыз куллану кала бирә. Шуңа да, янгынга каршы дәүләт хезмәте республика гражданнарын һәрчак ут белән сак эш итәргә чакыра.