2020 елда Казанда төзекләндереләчәк ишегаллары билгеле булды

Күпчелек ишегалды территорияләрен төзекләндерү проектлары җирле халыкның теләкләрен исәпкә алып эшләнеп беткән инде.

(Казан, 4 июнь, «Татар-информ»). Казанда «Безнең ишегалды» республика программасы буенча быел тәртипкә китереләчәк ишегалларының ахыргы исемлеге билгеле булды. Ул программаның рәсми сайтында урнаштырылган.

2020 елда төзекләндерелергә тиешле ишегаллары, шулай ук проектлаштырылачак ишегаллары һәм 2021-2024 елларга программага кертелгән ишегаллары Татарстан башкаласы картасында тәкъдим ителгән.

Агымдагы елда Казанда барлыгы 200дән артык ишегалдын тәртипкә китерергә җыеналар.

Проектлары халык тарафыннан килештерелгән ишегалларының бер өлешендә төзелеш эшләре башланган. Әлегә иҗтимагый фикер алышуларны узмаган планнар dvor.tatar сайтында июнь аенда басылып чыгачак.

Татарстанда яшәүчеләр үз ишегалларындагы эш барышын контрольдә тота ала һәм 8 (800) 275-20-20 номеры буенча кайнар элемтәгә шалтырата, программаның сайтына яки социаль челтәрләрдәге рәсми төркемнәренә (Instagram — @dvor.tatar, «ВКонтакте» — https://vk.com/dvor.tatar) мөрәҗәгать итә ала. Шулай ук WhatsApp номеры да эшли: +7 (939) 302-20-20.

«Безнең ишегалды» масштаблы программасын 2019 елда Татарстан Президенты Рөстәм Миңнеханов башлап җибәрде.