Әлмәтлене велосипед урлаган өчен ирегеннән мәхрүм иткәннәр

(Әлмәт, 3 август, "Татар-информ", "Әлмәт таңнары"). Әлмәттә яшәүче берәү велосипед урлавы өчен ике елга катгый режимлы колониягә хөкем ителә, дип яза җирле басма.

Җир асты кичүендә бер исерек адәм арткы тәгәрмәче трос белән беркетелгән “Стелс Навигатор” велосипедын күреп ала. Янәшәдә беркем дә булмаудан файдаланып ул велосипедны алып китә. Транспорт чарасының урынында булмавын күргәч, велосипед хуҗасы полиция хезмәткәрләренә мөрәҗәгать итә.

Видеокүзәтү камералары ярдәмендә каракның эзенә тиз төшәләр. Салынган зыян күләме 10 000 сум тәшкил иткән. Ул үзенең гаебен тулысынча таныган. Билгеле булганча, ир-ат өч тапкыр ирегеннән мәхрүм ителгән булган.