Дәүләт Советына өстәмә сайлауларда тавыш бирү өчен «электрон» урналар кулланылачак

Татарстанда беренче тапкыр сайлау округындагы барлык участоклар да сайлау бюллетеньнәрен эшкәртү комплекслары белән җиһазландырылачак.

(Казан, 3 август, «Татар-информ»). Татарстан Республикасы Дәүләт Советына өстәмә сайлауларны тавыш бирү өчен «электрон» урналар кулланып үткәрәчәкләр. Бу хакта «Коммерсантъ» хәбәр итә.

Чуйков сайлау округының барлык участокларын да автоматлаштырылган сайлау бюллетеньнәрен эшкәртү комплекслары белән җиһазландырачаклар. Бу бары тик 7нче шәһәр хастаханәсе территориясендә урнашкан «ябык» участокка гына кагылмаячак.

Татарстан Үзәк сайлау комиссиясе тарафыннан әлеге чаралар тавышларны санаганда объективлыкны тәэмин итү өчен үткәрелә.