Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Равил Фәйзуллин Фәрит Фарисовның «Белые волки» китабын яшь буынга укырга тәкъдим итте
Китап Советлар союзы дипломаты Кәрим Хәкимовка һәм Чечня сугышы вакыйгаларына багышланган.
![Равил Фәйзуллин Фәрит Фарисовның «Белые волки» китабын яшь буынга укырга тәкъдим итте](https://tatar-inform.tatar/resize/shd/images/uploads/news/2021/6/3/3e0d85d2c17b11086364dd1391d1586dcd30a384ace4401382e29641a84d.jpeg)
(Казан, 3 июнь, «Татар-информ», Зилә Мөбәрәкшина). Татарстанның халык шагыйре Равил Фәйзуллин Мәскәү шәһәре Татар милли-мәдәни автономиясе рәисе Фәрит Фарисовның дипломат Кәрим Хәкимовка багышланган «Белые волки» китабын яшьләргә укырга тәкъдим итәргә кирәк дип саный.
«Китапның кулъязма варианты белән ярты ел элек танышып чыктым. Ул ике өлештән иде. Фәрит Фарисович, чыннан да, бөек шәхесләр турында яза. Бу хезмәт яшь буын өчен файдалы. Китапны язганда үзеңә дә бүре булырга кирәк. Сез максатыгызга ирешә алгансыз. Мин үземә бик күп мәгълүмат алдым», — дип бәяләде ул китапны.
Равил Фәйзуллин Мәскәүдә күпчелек чараларның Фәрит Фарисов ярдәме оештырылуын да билгеләп үтте. «Көчегез ташып тора, мәшһүр татарлар белән тапшырулар да алып барасыз. Китаплар язарга кайдан вакыт табасыздыр?» — дип гаҗәпләнде шагыйрь.
Автор Кәрим Хәкимовның Согуд Гарәбстаны короле арасындагы ир-ат дуслыгы турында язган. «Китапны, иң элек, яшьләр укып карасын иде, чөнки алар җыентыкта тасвирланган вакыйгалар турында өстән-өстән генә белә», — диде Фәрит Фарисов.
![](/resize/750/images/uploads/news/2021/6/3/69230053dd1cf0397fb1802864dc5c27bb969bbbdc9559e700a7f2292bc0.jpeg)
«Сез күпләргә үрнәк булырлык шәхес. Аның профессиональ язучы түгел икәнен исәпкә алырга кирәк. Китапта Чечня сугышы вакыйгалары да сурәтләнә. Фәрит Фарисов ситуацияне гадел бәяләп яза. „Белые волки“ китабында постулатлар бар һәм аны һәр кеше үзенчә аңлый», — дип сөйләде Чечня Республикасы халык язучысы Канта Ибраһимов.
«Белые волки» повесте ХХ гасырдан башлап 2010 еллар уртасына кадәр Россиянең йөз еллык тарихын колачлый. Автор илебезнең Согуд Гарәбстаны Корольлеге белән дипломатик мөнәсәбәтләр урнаштыруы, Чечнядагы хәрби каршылык, дуслык һәм гаделлеккә ышаныч турында яза.
«Бүре — үзенчәлекле символ, төркиләр тотемы. Без ул символны югалттык. Тамырларыбызга кайтырга кирәк. Бүре — төрки халыкларның билгеле бер кыйммәтләр системасы, аерым ментальлеге. Бу — югары әхлаклылык, гаделлек, гаилә, азатлык һәм сафлык символы. Мин Кәрим Хәкимовта булган ихтыяр көченә шаккаттым», — дип сөйләде ул кичәдә.
Фәрит Фарисов дипломатның тормыш юлын җентекләп өйрәнгәнен әйтте. «Кәрим Хәкимов — гап-гади авыл малае. Башкортстанның Бишбүләк районыннан. Аңа эшләргә, гаиләсен ашатырга, камилләшергә, шул ук вакытта зур җаваплылык аша узарга туры килә. Китапта сүз Согуд Гарәбстаны Корольлеге барлыкка килү чоры, Хәкимовның король белән дуслыгы турында бара», — ди ул.
![](/resize/750/images/uploads/news/2021/6/3/e4aa280dc62ff8585ece383bafc2094fdcd0c67863c822996ccc5b705ba0.jpeg)
Галерея: Фәрит Фарисовның «Белые волки» китабын тәкъдим итү кичәсеннән фоторепортаж
Тәкъдим итү кичәсендә ТР Фәннәр Академиясенең Шиһабетдин Мәрҗани исемендәге тарих институты директоры Радик Салихов, Татарстанның халык шагыйрьләре Равил Фәйзуллин, җәмәгать эшлеклесе, журналист Римзил Вәлиев, Мансур хәзрәт Җәләлетдин, Муса Җәлил исемендәге Татар дәүләт опера һәм балет театры директоры Рәүфәл Мөхәммәтҗанов, ТР Дәүләт Советы депутаты Рамил Төхвәтуллин һ.б. танылган кунаклар катнашты.
Басмада дөнья күләмендә билгеле совет дипломаты Кәрим Хәкимов язмышы аша яхшылык һәм яманлык көрәше, кеше рухының бөеклеге, Ватанны ярату хисенең әһәмияте кебек темалар ачыла. Кәрим Хәкимов — уникаль тарихи шәхес. Дипломатны мөселман дөньясында бик югары бәяләгәннәр, ул үз вазифасыннан китеп, атып үтерелгәч, СССР белән элемтәләр озак елларга өзелә, диелә хәбәрдә.
Кызыклы яңалыкларны күзәтеп бару өчен Телеграм-каналга язылыгыз