Эчке эшләр министрлыгы россиялеләр өчен электрон паспорт кертергә планлаштыра

Онлайн-таныклыкка күчү «2021-2023 елларга цифрлы трансформация» программасы буенча үткәреләчәк.

(Казан, 3 март, «Татар-информ»). Россиядә РФ гражданнары өчен электрон паспортлар һәм чит ил кешеләре өчен шәхес таныклыгы кертү планлаштырыла.

«Россия гражданнары, чит ил гражданнары өчен дә шәхесен раслаучы электрон документка һәм мобиль кушымтага күчү өстендә эшлибез», — диде ведомство коллегиясендә Эчке эшләр министрлыгы башлыгы Владимир Колокольцев. Бу хакта РИА Новости хәбәр итә.

Министр аңлатканча, документларның электрон версиясенә күчү «2021-2023 елларга цифрлы трансформация» программасы буенча үткәреләчәк. Заманча технологияләр кертү ведомствоның мөһим бурычларының берсе булып тора.