Илшат Әминов: Талантлы журналистлар ел саен бик күпләп эштән китә
«Хезмәт күрсәтү өлкәсенә — пиар-менеджер, спичрайтерлар һәм башкалар булып китәләр, анда уртача хезмәт хакы массакүләм мәгълүмат чараларына караганда ике тапкыр күбрәк», — диде.
(Казан, 3 февраль, «Татар-информ», Гөлнар Гарифуллина). ТР Журналистлар берлеге рәисе, «Яңа гасыр» телерадиокомпаниясе генераль директоры Илшат Әминов журналистларның хезмәт хакы түбән булу проблемасын күтәрде. «Талантлы журналистлар ел саен бик күпләп китә», — диде ул.
«Хезмәт күрсәтү өлкәсенә — пиар-менеджер, спичрайтерлар һәм башкалар булып китәләр, анда уртача хезмәт хакы массакүләм мәгълүмат чараларына караганда ике тапкыр күбрәк. Анда уртача 80-100 мең сум түлиләр», — диде Илшат Әминов.
Ул ММЧ хезмәткәрләре хәзер уртача, ә районнарда түбән акча түләнә торган категориягә керүен билгеләп узды. «Журналистлар берлеге һәм „Татмедиа“ журналист һөнәре абруен күтәрер өчен бөтен көчен куячак. Без инде гонорарлар турында күптән әйтәбез», — диде Әминов.
Журналистлар берлеге рәисе милли кадрлар әзерләү өстенлекле мәсьәлә булуын ассызыклады. «Казан федераль университеты белән эшне дәвам итү кирәк, грантлар системасы безнең бердәнбер коткару чарасы», — дип белдерде.
Илшат Әминов, шулай ук, бүген аудитория визуальләштерелгән контентны яхшырак кабул итүен билгеләп узды.