Татарстанда ресторан һәм барларда кальян тартуның 70 очрагы ачыкланган

Җәмәгать туклануы оешмалары хуҗаларына административ беркетмәләр төзелгән.

(Казан, 2 ноябрь, «Татар-информ», Марат Ишкильдин). Казанда җәмәгать туклануы оешмаларында кальян тартуның 70 очрагын ачыкладылар. Бу хакта мэриядә үткән эшлекле дүшәмбедә Россия Эчке эшләр министрлыгының шәһәр буенча идарәсе башлыгы урынбасары Валерий Саматошенков сөйләде.

«Бүгенгә кальян тарту мөмкинлеге булган 70тән артык ресторан, бар, кафе ачыкланган, шул исәптән унысы — ике тапкыр. Шәхси эшмәкәрләргә һәм юридик затларга карата административ беркетмәләр төзелде», — диде Саматошенков.

Россия Федерациясе Хөкүмәте һәм Татарстан Республикасы Министрлар Кабинеты карарларын бозуга юл куймас өчен, кальян тарта торган җәмәгать туклануы биналары буенча даими рәвештә рейдлар үткәрелә.