Әлки районының Яңа Сихтермә авылына нигез салынуга 100 ел була
1920 елда аңа рәсми рәвештә нигез салына.
(Әлки, 1 апрель, «Татар-информ», «Әлки хәбәрләре», Олег Мурзин). Табигатьнең ямьле бер почмагында, урман эчендә урнашкан Яңа Сихтермә авылына нигез салынганга 100 ел тула. Бу турыда район басмасы хәбәр итә.
«Татарстан Республикасы торак пунктлары» иллюстрацияле энциклопедиядә Яңа Сихтермә турында болай язылган: «Яңа Сихтермә, Шәпкә елгасындагы бистә, Базарлы Матак авылыннан 12 км көньяк-көнбатышта. Бистә урынына иң беренче күчеп килүчеләр ХХ гасыр башында күренә башлый. 1920 нче еллар башында бистә административ рәвештә Сихтермә авылыннан (бүген Сихтермә-Хузангай) бүленеп чыга…»
Ә төгәлрәк әйткәндә болай: 1909-1910 елларда Афанасьев Роман, Чубуков Алексей, Морелев Кузьма һәм Сихтермәдән тагын 30 хуҗалык, Столыпин реформасы ташламаларыннан файдаланып, авылдан аерылып чыгалар. Яңа Сихтермә шулай барлыкка килә. 1920 елда аңа рәсми рәвештә нигез салына.