Зәй яшьләре клоун булып йөреп файда китерә

Биредә “Больничный клоун” проекты уңышлы тормышка ашырыла

 (Казан, 1 апрель, “Татар-информ”). Зәйнең яшьләр эшләре идарәсе үзәк дәваханәнең балалар бүлегендә дәваланучы сабыйлар өчен “Больничный клоун” проекты кысаларында махсус күңел ачу программасы күрсәтте. Күңел күтәренкелеге алуның сәламәтләнү процессы өчен уңай тәэсир итүе билгеле. Клоуннар балаларга төрле тамашалар тәкъдим итте, сабыйларның үзләрен дә уеннарда катнаштырдылар. Соңыннан һәр бала бүләкләр алды, дип белдерә “Зәй офыклары” газетасы.