Чечня башлыгы: Рөстәм Миңнеханов зирәклеге һәм тәҗрибәсе белән уртаклашырга әзер
Рамзан Кадыров Татарстан Президентын 63 яшьлек юбилее белән котлады.
(Казан, 1 март, «Татар-информ»). Чечня Республикасы башлыгы Рамзан Кадыров Татарстан Республикасы Президенты Рөстәм Миңнехановны туган көне белән котлады. Инстаграмдагы аккаунтында котлау белән бергә ул республика җитәкчесенең эш көннәренә багышланган видеоролик урнаштырды.
«Безне Рөстәм Нургалиевич белән, безнең төбәкләр кебек үк, ныклы дустанә мөнәсәбәтләр бәйли. Очрашу барышында без һәрвакыт бәйләнеш нокталарын табабыз, Чечня Республикасы белән Татарстан арасында мәдәни, рухи һәм икътисади элемтәләрне ныгытуның иң нәтиҗәле юллары турында фикер алышабыз», - диде Рамзан Кадыров.
ТР Президенты берничә тапкыр Грозныйга килде, социаль әһәмияткә ия өлкәләрне үстерүдә Чечня Республикасының уңышлары белән шәхсән танышты. Рамзан Кадыров сүзләренчә, Рөстәм Миңнеханов «һәрвакыт киңәш белән ярдәм итәргә, иң мөһим бурычларны хәл итүдә үзенең зирәклеге һәм тәҗрибәсе белән уртаклашырга әзер».
«Мин чын күңелдән Рөстәм Нургалиевичны туган көне белән котлыйм! Татарстанга һәм безнең уртак Ватаныбызга - Россиягә хезмәт итүдә бәхет, иминлек һәм уңышлар телим!» - дип йомгаклады Кадыйров.
Аның котлауларына язылучылар да кушылды.
Бүген, 1 мартта, Татарстан Президенты 63 яшьлеген бәйрәм итә.