Җәмгыять 12 февраль 2026 18:01

Социаль фондның Татарстандагы бүлеге бердәм пособие исәпләү кагыйдәләрен искәртте

Скопировать ссылку

Бүген иҗтимагый оешмалар вәкилләре белән очрашуда Россия Социаль фондының ТР буенча бүлеге идарәчесе урынбасары Елена Полякова Татарстаннан балалы гаиләләргә бердәм пособие исәпләү кагыйдәләре турында сөйләде. Әңгәмә Казанда ЗАГС мәйданчыгында узды.

«Пособиегә хокук хезмәткә сәләтле гаилә әгъзаларының хезмәт потенциалын комплекслы бәяләү нәтиҗәләре нигезендә билгеләнә», - дип хәбәр итте ул.

Хезмәткә сәләтле гаилә әгъзасының 23 яшькә кадәр көндезге бүлектә укуы, өч яшь кадәрге баласын каравы, РФ Кораллы Көчләрендә хезмәт итүе һәм башка сәбәпләр буенча кереме булмаска мөмкин. Пособие Россия гражданнарына билгеләнә.

Гаиләнең тулаем керемен исәпләгәндә түбәндәгеләр исәпкә алына:

хезмәт бурычларын яисә башка бурычларны үтәгән өчен түләүләр;
пенсияләр, пособиеләр һәм башка шундый ук түләүләр;
стипендияләр;
алынган алимент суммасы;
хәрби хезмәткәрләрнең, хокук саклау һәм башка органнар хезмәткәрләренең акчалата тәэмин ителеше;
кыйммәтле кәгазьләр белән операцияләр буенча алынган дивидендлар, процентлар һәм башка керемнәр;
банклардагы кертемнәр буенча процентлар рәвешендәге керемнәр;
эшкуарлык эшчәнлегеннән керемнәр;
махсус салым режимын куллану кысаларында алынган керемнәр;
мөрәҗәгать итүченең яисә аның гаилә әгъзаларының Россия Федерациясеннән читтә алган кереме.

«Герой-ана» исеме, «Ата-ана даны» ордены яисә медале белән бүләкләнгән ата-аналарга бүләк итеп бирелгән түләүләр, опекада яисә попечительлектә торучы 18 яшькә кадәрге балаларның банклардагы счет процентлары, балигъ булмаганнарның укудан буш вакытларында эшләгән хезмәт хакы, федераль бюджет акчалары исәбеннән бер тапкыр бирелә торган матди ярдәм исәпкә алынмый.

Сәхифәләр

Социаль фондның Татарстандагы бүлеге бердәм пособие исәпләү кагыйдәләрен искәртте