Җәмгыять 30 сентябрь 2024 15:10

Синоптиклар Татарстанда бераз суытачагы хакында кисәтте

Скопировать ссылку

Алдагы көннәрдә Татарстанда антициклоннар алмашыначак, нәтиҗәдә бераз суытырга мөмкин. Явым-төшем көтелми, дип белдерделәр ТР Гидрометеорология һәм әйләнә-тирә мохитне күзәтү идарәсендә.

1 октябрьдә төнлә төбәктә +5..+10 градус җылы булачак, урыны белән һава температурасы +3..-2 градуска кадәр төшәргә мөмкин. Көндез термометрның терекөмеш баганасы +18..+23 градуска кадәр күтәреләчәк.

2-3 октябрьдә 0..+6 градус, түбән урыннарда 0..-2 градус булуы көтелә. Көндез исә +15..+20 градуска кадәр җылытачак.

Җомга һәм шимбәдә һава торышында сизелерлек үзгәрешләр көтелми. Явым-төшем ихтималы аз, көндез һава температурасы +15..+20 градус тәшкил итәчәк.

Элегрәк коры һәм җылы һава торышы аркасында республикада шторм кисәтүенең озайтылуы билгеле булган иде, бу урманнарда янгын чыгу куркынычы югары булу белән бәйле.

Сәхифәләр

Синоптиклар Татарстанда бераз суытачагы хакында кисәтте