Синоптик Татарстанда кар яву ихтималы турында искәртте
Апрельдә һава температурасы еш үзгәреп тора.
Татарстанда бик җылы һава торышы киләсе атна уртасына кадәр сакланачак, ә аннары сизелерлек суытачак. Бу хакта «Татар-информ»га «Метео» фаразлау үзәге җитәкчесе Александр Шувалов хәбәр итте.
«Якындагы атнада Урта Идел буенда һәм Татарстанда һава торышы айның беренче яртысында күзәтелгән тенденцияне дәвам итәчәк. 20 апрельдән 22 апрельгә кадәр температура +22 градуска якын булган көннәр аеруча җылы булачак», - дип сөйләде ул.
Синоптик мәгълүматлары буенча, 20 апрельдән 22 апрельгә кадәр һава температурасы климатик нормадан ун градуска югарырак булачак. Һава торышы ай ярымга алга китәчәк.
Ләкин апрельдә һава температурасы еш үзгәреп тора. 23 һәм 24 апрельдә татарстанлыларны кискен суыту көтә.
«Явым-төшемле һава торышына күчү көтелә, 24-25 апрельдә юеш кар һәм көндез температураның кискен төшүе дә мөмкин», - дип аңлатты метеоролог.
Аның сүзләренчә, бу салкыннар бик кискен булачак. Язның икенче аеның соңгы көннәрендә уртача температураның климатик нормадан 5-7 градуска түбәнрәк булуына әзерләнергә кирәк.