Синоптик июньнең соңгы ункөнлегендә температура нормадан түбәнрәк булачагы турында әйтте
Россия Гидрометеорология үзәге фаразлавынча, июньнең өченче декадасында Татарстанда һава температурасы климатик нормадан бер градуска түбәнрәк булачак. Бу хакта «Татар-информ»га ТР Гидрометеорология үзәгенең метеофаразлар бүлеге башлыгы Ирина Трущина хәбәр итте.
«Июньнең беренче декадасында республика буенча температураның климатик нормасы – 16,2 градус, икенче декадада – 18 градус, өченче декадада – 19,2 градус», - диде ул.
Сезонлы фаразларга караганда, июльдә Татарстанда һава температурасы климатик нормага якын булачак, ә август һәм сентябрьдә – бер градуска югарырак.
Июньдә Казанда һаваның уртача айлык температура нормасы 18,3 градус тәшкил итә, ә явым-төшем күләме – 57 миллиметр, июльдә – 20,5 градус һәм 63 миллиметр, августта – 18,3 градус һәм 54 миллиметр.
Татарстан буенча июньдә уртача айлык температура нормасы 17,8 градус, июльдә – 19,9 градус, августта – 17,7 градус. Республика буенча өч җәй аенда уртача явым-төшем нормасы - 59,9, 55,9 һәм 54,4 миллиметр.