Синоптик фаразлавы: Татарстан аграрийлары язгы чәчүгә 27 апрельдән дә калмыйча чыгачак
Язгы кыр эшләренә Чистай, Буа, Чүпрәле районнары беренчеләрдән булып керешәчәк.
(Казан, 30 март, “Татар-информ”, Чулпан Шакирова). Республиканың авыл хуҗалыгы хезмәтчәннәре язгы кыр эшләренә 27-28 апрельдән дә калмыйча төшәчәк. Бу хактагы фаразларны “Татар-информ” хәбәрчесенә Татарстан фәнни-тикшеренү институтының әйдәп баручы фәнни хезмәткәре Олег Шайтанов хәбәр итте. Әлеге күзәтүләрне ул республика районнарында яткан кар катламыннан чыгып ясаган.
“Кар Казан тирәсендә һәм республиканың төньяк-көнбатыш районнарында күп. Болар: Лаеш, Балык Бистәсе, Питрәч, Әтнә, Биектау, Арча, Кукмара, Балтач, Яшел Үзән районнары. Калган районнарда кар нормада. Шулай ук Тәтеш, Нурлат, Аксубай районнарында 55-72 см калынлыгында кар яткан. Чистай, Буа, Чүпрәледә, киресенчә, кар катламы, нормадан түбәнрәк. Монда кар 30 см калынлыгында", – диде Олег Шайтанов.
Кар катламы нормадан түбән районнар язгы кыр эшләренә беренчеләрдән булып керешәчәк.
“Көннәр җылыта башлау белән Буа, Чүпрәле, Чистай районнары язгы кыр эшләренә 20-23 апрельдә чыга ала. Калган районнар исә кыр эшләренә 27-28 апрельдән дә калмыйча керешәчәк. Минем уйлавымча, 1 майда республиканың һәр районында язгы кыр эшләре гөрләр”, – диде Шайтанов.
Искәртеп үтик, Татарстанда 10-11 апрельдә басуда кардан ачылган урыннар күренә башлый. Кырларда барлык кар 17-19 апрель ахырында эри. 3 майда исә туфрактагы туң тулысынча эреп бетә.
Исегезгә төшерик, Олег Шайтанов “Татар-информ”га алдарак җәйнең нинди киләсен һәм язның соңга калу-калмавы турында да әйткән иде.