“Шәһри Казан” газетасы редакциясе “Татмедиа” бинасына күченә
Редакция газета гамәлгә куелганнан бирле Чистай урамы, 5нче йортта эшләде.
(Казан, 26 июль, "Татар-информ", Зилә Мөбәрәкшина). “Шәһри Казан” газетасы редакциясе Чистай урамы, 5нче йорттан Декабристлар урамы, 2нче йортка - “Татмедиа” матбугат һәм гаммәви багланышлар буенча республика агентлыгы урнашкан бинага күченә. Бу хакта “Татар-информ” хәбәрчесенә газетаның баш мөхәррире Радик Сабиров сөйләде.
“Шәһри Казан” газетасы редакциясе Чистай урамындагы бинада 1992 елдан бирле эшләп килде. Ул “Татмедиа” балансында түгел иде. Торак-коммуналь хуҗалыгы, электр һәм башка чыгымнарны редакция үзе күтәреп барды”, - диде ул.
Элекке бинада музей почмагы да булган. “Бездә альбомнар, дивар газеталары бар. Аларны да үзебез белән алып киләчәкбез”, - дип сөйләде Радик Сабиров.
Мөхәррир сүзләренчә, редакция әлегә “Татмедиа”ның унынчы катына гына күченәчәк. “Төзекләндерү эшләре беткәч, сигезенче катка күчәчәкбез. Монысы рәсми документларда расланган”, - дип аңлатты мөхәррир.
- “Шәһри Казан” газетасы - Татарстан башкаласының көндәлек иҗтимагый-сәяси һәм мәдәни газетасы. Газета татар телендә нәшер ителә. 1990 елның 17 августыннан чыга башлый. Бүгенге көндә редакциядә утыз кеше эшли. Быел газетаның баш мөхәррире итеп Радик Сабиров билгеләнде.