Себер төбәге татарларыннан Әдәби бәйгедә каһарманлык турында әсәрләр көтәләр
Төмән өлкәсе һәм ХМАО, Ямал-ненец автоном округындагы шәһәрләрдә яшәүчеләрдән «Каләмле себер» иҗат бәйгесенә әсәрләр кабул ителә. Язмаларны 18 апрельгә кадәр җибәрергә була, дип хәбәр итә бәйгене оештыручылар.
Алар бигрәк тә мәктәп укучыларын, укытучыларны актив катнашырга өнди.
«Конкурс талантлы балаларны һәм шул ук вакытта укытучыларны да ачыкларга ярдәм итә. Чөнки балага юл күрсәтүче, өмет, канат бирүче дә - укытучы. Шуңа күрә күбрәк активлыкны укытучыларыбыздан да сорыйсыбыз килә. Конкурс «Төмән өлкәсендә яшьләр арасында шагыйрьләр, язучылар күпме?» дигән сораудан башланды. Кадерле, тынгысыз укытучылар, ата-аналарыбыз бүгеннән үк моңа күбрәк игътибар бирсәк иде. Һәрбер балада талант бар. Ә аның ачкычы сезнең кулда…», - дип мөрәҗәгать итә «Каләмле Себер - 2025» конкурсын оештыручыларының берсе, журналист, җәмәгать эшлеклесе Таңсылу Габидуллина.
«Каләмле Себер - 2025» конкурсы Төмән өлкәсе Татар конгрессы тарафынннан гамәлгә ашырыла. Бәйге ике номинациядә уза.
- Ватанны саклаучылар елы уңаеннан «Минем өчен герой ул...» темасына проза, очерк, хикәя;
- «Шигырь» (тема: туган як, туган тел, гаилә, мәктәп, милләт, патриотлык).
Иҗади эшләрне 18 нче апрельгә кадәр t.gabidullina@mail.ru электрон адресына кабул итәләр.
Нәтиҗәләр 26 нче апрельдә Габдулла Тукайның туган көнендә Төмән шәһәренең 52 нче мәктәбеңдә тантаналы рәвештә ясалачак. Бу көнне катнашучыларны, җиңүчеләрне бүләкләр, дипломнар һәм күңелле җырлы-моңлы, әкияти очрашу көтә, диелә хәбәрдә.