КФУ студентларын апрель аенда тулай торак өчен түләүдән азат иткәннәр

(Казан, 30 апрель, «Татар-информ», Гөлнар Гарифуллина). КФУ студентларын апрель аенда тулай торак өчен түләүдән азат иткәннәр. Бу хакта КФУ ректоры Илшат Гафуров туры эфир барышында әйтте.

«Күп кенә студентлар коронавирус белән бәйле чикләүләр чорында эш урыннарын югалтты. Бу аларның керемендә, уку өчен түләүләрендә дә чагылыш тапты, шуңа күрә апрельдә аларны тулай торак, коммуналь  хезмәтләр өчен түләүдән азат иттек. Дөрес, моның нәтиҗәсендә университет та 7 млн сум акчасын югалтты, дөресрәге, шулкадәр акча кермәде», — диде.

Илшат Гафуров сүзләренчә, изоляция вакытында өйләренә әти-әниләре янына кайтып китә алмаган чит ил студентлары тулай торактан чыгарылмаган. «Аларның май бәйрәмнәрендә дә монда калуы һәм уку елын төгәлләве хәерлерәк», — диде ректор.