Алабуганың педагогик коллективлары фестивальдә үзләренең нәрсәгә сәләтле булуын күрсәтте

(Алабуга, 30 апрель, “Татар–информ”, Гөлшат Солтанова). Алабугада педагогик коллективларның беренче ачык фестивале узды. Фестивальдә шәһәр мәктәпләренең педагогик коллективлары үзләренең нәрсәгә сәләтле икәнлеген күрсәтте.
Чараның максаты – үзара хезмәттәшлекне ныгыту, формаль булмаган шартларда аралашу, шулай ук укытучыларның иҗади сәләтләрен ачу һәм тормышка ашыру. “Мәктәп – ул дәресләр һәм тәнәфесләр, укыту планы һәм ата–ана җыелышлары гына түгел. Ул – зур иҗади рухлы, олы талантка ия мөгаллим”, – ди район башкарма комитеты җитәкчесе урынбасары Елена Соловьева.
Һәр команда үз уку йортының үзенчәлекләрен ачты. Өстәвенә, моны гадәти булмаган формада эшләделәр. Укытучылар үз эшчәнлекләре хакында сөйләде, такмаклар әйтте.
Шәһәрнең педагогик коллективлары арасында 4 нче гимназия командасы беренче урынны яулады. Аларга 3 мең сумлык сертификат тапшырдылар. 10 нчы мәктәп командасы – икенче, 9 нчы мәктәп вәкилләре өченче урынга лаек булды.