420066, Казан, Декабристлар урамы, 2
“ТАТМЕДИА” акционерлык җәмгыяте
Илсур Һадиуллин «Җиңү диктанты» сорауларын кызык дип бәяләде
«Бәлки, кайсыдыр сорауларга дөрес җавап та бирмәгәнбездер. Иң мөһиме — катнашуым, шуның белән без яшьләргә үрнәк булырга тиеш», — дип белдерде министр.
(Казан, 29 апрель, «Татар-информ», Гөлнар Гарифуллина). Татарстанның мәгариф һәм фән министры Илсур Һадиуллин «Җиңү диктанты» сорауларын кызык дип бәяләде. Бүген ул Казанның 98 нче мәктәбендә шушы диктантны язды.
«Җиңү диктанты» сораулары кызык. Икеләнмичә җавап бирер өчен яңадан бер карап чыгарга кирәк булган икән дип уйладым әле менә. Сорауларга килгәндә, мәсәлән, Муса Җәлилнең өч шигыре бирелгән. Берсе нигезендә дүрт җавап каралган. «Моабит дәфтәре» дигән җавапны сайладым, дөрес дип уйлыйм», — дип сөйләде министр «Татар-информ» хәбәрчесенә.
Илсур Һадиуллин, шулай ук, яшь белорус партизаннары Марат Казей белән аның сеңлесе, «Дорога жизни», быел Самарада куелачак 179 генералга мемориаль һәйкәл турында сораулар булганын әйтте.
«Бәлки, кайсыдыр сорауларга дөрес җавап та бирмәгәнбездер. Иң мөһиме — катнашуым, шуның белән без яшьләргә үрнәк булырга тиеш», — дип белдерде министр.